Friday, July 19, 2019
Follow Us on :

ఆస్ట్రేలియాతో సిరీస్‌ పరాజయం మంచిదే..!

By BhaaratToday | Published On Mar 21st, 2019

ఆసీస్‌పై 2-0తో ఆధిక్యంలో ఉండి కూడా భారత్‌ సిరీస్‌ను చేజార్చుకున్న సంగతి తెలిసిందే. సొంతగడ్డపై ఆస్ట్రేలియాతో వన్డే సిరీస్‌లో 2-3తో ఓటమి టీమ్‌ ఇండియాకు ఓ హెచ్చరికలా పనిచేస్తుందని రాహుల్‌ ద్రవిడ్‌ అభిప్రాయపడ్డాడు. మే 30న ప్రపంచకప్‌ ఆరంభం కావడానికి ముందు కోహ్లీసేనకు ఇదే ఆఖరి సిరీస్‌. ‘‘మనం అలవోకగా ప్రపంచకప్‌ గెలుస్తామనే అభిప్రాయంతో ఉన్నాం. ఆ నేపథ్యంలో సిరీస్‌ పరాజయం మంచిదే. ప్రపంచకప్‌లో మనం చాలా బాగా ఆడాల్సిన అవసరాన్ని ఆ సిరీస్‌ ఫలితం గుర్తు చేసింది’’ అని ద్రవిడ్‌ అన్నాడు. ‘‘గత రెండేళ్లలో వన్డేల్లో భారత్‌ విశేషంగా రాణించింది. నంబర్‌వన్‌ జట్టు కూడా. అందుకే ప్రపంచకప్‌ తేలిగ్గా గెలుస్తామని అభిప్రాయం ఏర్పడిందని.. మన జట్టు ఇప్పటికీ ప్రపంచకప్‌ ఫేవరెట్లలో ఒకటన్నది నా అభిప్రాయమ‌ని బుధవారం ఓ కార్యక్రమం సందర్భంగా ద్రవిడ్‌ వ్యాఖ్యానించాడు.

ఆటగాళ్ల పని భారానికి సంబంధించి అందరికీ ఒకే విధానాన్ని అమలు చేయడం కుదరదని ద్రవిడ్‌ చెప్పాడు ‘‘ఈ విషయంలో చాలా మంది క్రికెటర్లకు అవగాహన ఉంటుంది. తమ శరీరం ఎంత మేర పని భారాన్ని తట్టుకుంటుందన్నది వాళ్లకు తెలుసు. ఎవరూ కూడా తమ దేహం తట్టుకోలేనంత స్థాయిలో ఆడరని అనుకుంటున్నా. అందరికీ విశ్రాంతినిచ్చేలా ఓ విధానాన్ని రూపొందించడం కుదరదు. మనం ఆటగాళ్లను నమ్మాలి. ఏం చేయాలో వాళ్లకు తెలుసు’’ అని ద్రవిడ్‌ చెప్పాడు.